出發喇~ 第一天 - 由香港到台北 (單車 - 0 km)

公司6月30號LAST DAY, 我7月2號就飛~ 好似好趕時間咁......

其實係唔想浪費時間響香港HEA, 同埋而家仲係初夏, 越遲越熱, 仲有打風既機會就會越大..... 打風係會好影響行程, 同埋冇咁安全.....仲有最重要既早出發原因係..... 避開農曆七月!!!!! 我自認膽小..... 遇到咩特別事就唔好啦...... 所以要盡早出發!!!!!

就係咁, 我就搭7月2號既0950機飛台北~ 搭長榮 -- 因為港龍國泰貴, 中華就..... 都話我膽小啦, 所以就搭長榮~ 兩個月有效機票, 可以改日子, 埋單HK$2,457~

愉快的機程~

一早去到機場, CHECK-IN 既時候有野送~

同第一個partner 搭同一班機, 響飛機度meet~ 響呢度, 就叫佢做 A 小姐啦~ 由於我地唔係一齊CHECK-IN, 冇得坐埋一齊..... 唔緊要啦~ 個幾兩個鐘機之嘛~ 之後成個星期日見夜見, 見到嘔都得喇~ 落機先再同佢傾~

上機喇~ 

響飛機上面, 我隔離坐左個台灣人, 佢就順口問幾句, 問我係咪去台灣旅遊, 多謝去幫助佢地旅遊業.... 我見佢都拎住一袋二袋DISNEY 同老婆餅, 我都回敬佢一句, 多謝你到香港消費~ HAHAHAHA~

估唔到一上飛機就開始我既搭訕之旅...... 我地傾左成程機, 佢問我打算響台灣邊度玩, 我就話玩晒成個台灣 --- 環島~ 我拎張地圖出黎話佢知踩單車, 沿住條路兜台灣一個圈, 佢即刻呆左...... 話你幾多人去?? 踩單車??? 兩個女仔???!! 佢頭頂有好多問號........ 究竟係我睇落去太老 OR 太潺, 唔似有力踩??? 定係我睇落太斯文, 唔似會踩單車? (識我既朋友一定唔會認同第二點.....哈哈~).....

就係因為踩單車環台呢個TOPIC, 我就同佢傾足成程機~ 佢仲介紹我台灣D咩夜市好去, 係LOCAL 人成日去, 而唔係遊客會去既~ 佢話D 野好食D, 平D, 冇咁旅遊區~ 仲話返到去台北買手信既時候, 可以去邊度, 邊間買~ 佢真係好好人, 臨落機仲俾佢張卡片我, 話如果有咩可以幫到手既, 可以打俾佢喎....... 估唔到響飛機就已經開始遇到好人, 好開心呀~~愉快既一程飛機呀~

到達桃園機場, 出發去單車鋪~


落左機, 搞入境手續, 拎行李, 拎寶貝機卡同申請青年卡, 搵ATM 攞錢..... 搞掂晒去搭飛狗都已經係12:45PM..... 我諗今日都係唔可以起行架喇...... 算啦, 拎左單車先算~

去到台北市..... 點幾兩點..... 好肚餓呀...... 食野先~

呢個叫福州包~ 10蚊台幣3個..... 即係1蚊港紙一個..... 好平呀~ 又好味~ 正~ 

食飽飽~ 由台北車站去關渡 -- 單車鋪!!!! 原來係唔近捷運站, 都少少遠, 我地仲要出錯出口..... 兜左個大圈.........又熱, 又拎住個喼...... 好攰呀......

幾經辛苦,終於黎到單車鋪喇~

 

呢D 就係我全部行李喇~ 個喼其實冇乜野響入面, 全部都係單車裝備同衫...... 我個喼會留響單車鋪, 返黎台北還車先拎返~ 最後個喼只係得返一本台北書, 其他全部都係隨身行李~ 

 將行裝放晒落馬鞍袋..... 其實都有幾多位剩, 即係我其實得好少行李.... HAHAHA~

 跟住, 我地成個晏晝都係響單車鋪..... 學修理車.... 點換軚, 點補軚, ETC~ 老闆鳥哥好有心機教我地~

 我架戰車~

 我地響佢鋪頭其間, 有其他人黎租環島單車.....差唔多全部都係香港人...... 老闆應該去學廣東話啦~ 哈哈~

同埋記得要預早BOOK 單車, 我去到單車鋪, 見到有人租唔到車.... 因為D 車未返到黎..... 好在我同A 小姐既車都準備好0者~

搞掂晒都成6點, 冇得出發啦~ 今晚唯有留響關渡, 聽朝一早先出發啦...... 老闆鳥哥話關渡得一間住宿, 就係仙渡莊~ 咁我地就去搵仙度拉個FRIEND -- 仙度莊~

叫得旅社,都唔後生啦..... 超舊... 但係都算乾淨企理~ 是但啦~ 都冇得揀.... 唔通出返台北市咩???!!

 搞掂住宿, 下一站梗係... 食飯!!!

 原來呢度有D餐廳係有免費野飲, 任你飲~ 呢度就係有甜既涷紅茶~

食飽飯,周圍散下步就返仙渡莊喇~ 諗住抖足精神, 準備第二朝出發..... 點知.... 女仔就係呢樣衰.... 雞啄唔斷..... 傾計傾到好夜先訓..... 哈哈~