第四天 - 通宵鎮到大村 (單車 - 68 km)

 呢度就係間旅社既lobby......舊到呢.......

其實個婆婆老闆好老, 佢其實都幾好人, 但係實在..... 感覺唔乾淨, 好多昆蟲.... 好多蚊...... 呢晚真係我地既惡夢呀... 我其實成晚都訓唔到, 等極都未天光..... 到朝早, 我同A小姐好快手咁執野走..... 呢間野迫我地早D出發........

向彰化出發~

離開左個惡夢之後, 去食個早餐先~ 7-11..... 我既茶葉蛋~ hehee~

我地響大旅社遇到幾個之前響單車鋪遇到既香港人, 佢地一行四人都係過黎環島既~ 佢地係行台1線落黎..... 由於太多地方補給 (即係誘惑.....), 所以踩得好慢...... 同埋佢地實力懸殊, 兩個男仔踩得快, 兩個女仔踩得慢..... 都好難夾.... 一係就兩個女既追得好辛苦(都未必追到), 一係就兩個男仔係咁等....... 所以我覺得自己好好彩, 同A 小姐既速度都OK~ 唔駛就住就住~ YEAH~

由於我地之前都係行海線, 聽到佢地行台1線咁多補給同入CITY, 我地海線又冇乜特別既景睇~ 所以我地決定試下行台1線~


呢日天氣好好~ 呢間係公司黎架, 佢出面寫住歡迎鐵馬入去加水~ 我地D 水都差唔多飲晒, 入去八卦下先~ 入面既姨姨好好人呀, 響雪櫃拎左好多杯涷水俾我地飲, 仲叫我地拎走添呀~ 我地拎左到飲既時候咪又係熱水, 所以我地冇拎涷水走~ 同呢個姨姨都幾好傾~

 台1線既沿路風光~

 同我地行海線既荒蕪差好遠呀......

踩到沙鹿, 見到入台中既路..... 入唔入台中好呢???!

最後都係..... 唔入~ HEHEEE~ 懶呀~

其實我地之前係想去清境農場一帶同阿里山架 (當然唔係踩上去啦, 係放低架單車, 搭車上去~), 但係計過條數, 驚天氣有變OR有咩事, 仲有就係唔想踩得太趕...... 我地商量過之後, 覺得用D 時間黎慢慢感受旅途中既人同事, 好過趕頭趕命去遊客區...... 呢D 遊客區, 我地第時再黎台灣既時候都好易去到, 唔駛而家趕住去丫~ 所以, 我地都冇必要入台中~ 就沿住條路咁踩落去就算~

太陽好勁呀.... 又係時候搵我地既思樂冰~ 點知.....

呢間7-11 竟然冇思樂冰????!!!!! !@#*@&(#$*(&(_)*#$)(@*&#*!@(_#!@)&$&#^(

 算啦.... 唔搵第二間7-11 喇.... 食雞翼補返數......

2點幾, 繼續~

 向彰化出發..... 得9KM, 咁快到..... 我諗我地可以再踩落D~

遇見好好的伯伯~

踩踩下有條好大既路....D 牌多到唔識睇..... 都係停低問人, 順便抖下先~ HEHEHEE~

我地就係咁, 停埋一邊.... 原來停左響個伯伯既鋪頭門口~ 佢知道我地兩個女仔係香港黎踩單車, 由台北踩到呢度, 佢好關心我地, 叫我地一路要小心呀..... 同埋叫我地入去佢鋪頭休息, 沖茶俾我地飲, 抖下~ 但係我地點好意思呢? 所以我地就響佢門口傾計.... 佢一見到有隔離鄰舍行過就好大聲用台語同人講話呢兩個女仔係響香港黎踩單車.... (我唔識台語, 我係估既....)... 就係咁, 佢D鄉里圍住晒我地, 好好笑~

我仲有同伯伯影相, 佢好KAWAII 呀~ A 小姐幫我影既時候數一, 二,三, 伯伯突然伸出V字手勢講"YEH" 喎~好好笑, 好可愛呀~ 佢真係好好, 一路係咁提點我地~

到我地臨走既時候, 佢響鋪入面拎左支大既茶裏王出黎, 結冰架~ 佢話入面係蜂蜜水, 結左冰, 我地踩到落腳既地方就ARM ARM 好, 可以倒出黎飲......

我真係好感動呀.............. 佢仲用報紙包好, 驚D 倒汗水整濕我地D 行李..... 佢真係好好呀, 好感謝佢呀.......

之後一路踩, 我都一路諗起伯伯呀....... 真係感動到想喊出黎呀~ 台灣人真係好好, 好熱情, 好有人情味呀!!!!! 頓時覺得香港既好客之道???!!!!! 唔好再講啦......

借宿一宵???!!

由於去到彰化時間尚早, 我地決定踩多少少..... 差唔多天黑既時候, 我地去到大村.... 突然響路邊有人衝出黎叫"加油"!!!! 我見佢咁熱心, 就停低問佢附近有冇住宿既地方, 點知佢話附近冇喎, 仲話天氣咁熱, 落車抖下食個冰啦.... (原來0個度係一間冰鋪) ..... 咁我就想再問佢踩落去邊度有住宿, 要踩幾遠..... 佢話口未完, 就話請我地食冰, 仲ORDER 埋添..... 我地見盛情難卻, 就坐低啦..... 同佢傾傾下, 原來佢都有踩單車, 仲環過幾次島添~ 同佢傾計既時候, 留意到佢一提起單車佢個樣就好開心, 同傾其他野好唔同.... 我諗佢真係好鍾意踩單車~

天開始黑喇, 我就再問佢邊度有住宿, 佢話要踩到去員林, 咁我問遠唔遠啦.... 佢話而家放工時間多車, 踩去員林都要一段時間..... 咁我同A小姐就商量點算.... 因為真係好多車, 尤其係機車, A 小姐好擔心~ 同埋好擔心天黑踩危險..... 正當我地諗緊點算之際, 呢位大哥就話, 如果你地唔介意既, 可以去佢屋企訓喎, 但係要行上5樓同埋冇冷氣...... 我地覺得好突然, 真係唔識俾反應.....

其實我同A小姐都覺得有危險, 但係又真係天黑, 又好多車, 唔想踩落去......再同呢位大哥傾下傾下, 知佢結左婚, 同老婆 & 兩個女一齊住..... 全部都係佢講架, 我地未見到......

我地諗諗下, 最後決定搏一搏, 大家小心D, 應該冇事既.... 有咩唔對路就即走.......

就係咁.... 我地兩個女仔就去左一個剛相識既男人屋企訓..... 而家諗返都覺得自己痴左線, 再有一次咁既事發生, 我都未必敢去人地度借宿一宵.......

因為佢開車, 我地踩單車, 佢教我地點去佢屋企, 留低電話, 我地就自己去佢度..... 中途我地盪失路, 遇到一個好好人既肥哥哥幫我地~ 最後呢位大哥都係要踩單車出黎接我地~ HAHA~

一入到屋, 見到佢既細女, 個心都定D~ 之後見埋佢個大女, 定晒~ 我地覺得住佢度, 唔係幾好意思, 所以要請返佢地食飯~ 佢帶左我地去食拉面~ 簡直係平靚正~ YUMMY~

嗰晚, 呢位大哥仲介紹左d 住宿同好踩d 既路線俾我添~ 呢一晚真係好特別呀..... 本來以為遇到個伯伯已經好特別, 點知夜晚遇到既仲精彩!!!! 其實知道危險, 但係都好多謝呢位大哥收留左我地, 好開心亦都好慶幸, 自己真係遇到好人~

 呢度就係我地訓既地方~