張小姐的台灣單車環島遊~: 第六天 - 嘉義到新市 (單車

呢日其實可以訓得幾好, 但係我成日醒..... 發夢見到自己踩單車, 係咁踩, 踩到去一個目標地方, 停落黎就醒.... 不停地LOOP..... 好辛苦.... 但係都算訓到既.....

出發之前食早餐~ 呢個係旅店既早餐......

全部都係面包..... 得牛油, 花生醬, 朱古力醬, 果醬....... 好過冇, 唔駛錢既, 食飽D 先上路~
朱古力醬令我諗起澳洲旅行既日子..... 好回味~

食飽飽, 行LU~

我真係零方向感.... 行錯路, 行左反方向, 浪費左幾KM 既腳骨力.... ai.... 下次出發前, 記得問路呀....

搵返條arm 既路行, 沿住台1線踩~

北回歸線~

今日都踩得幾順~ 好快就見到可以hea 既地方~有景又有長櫈~ 可以訓響度hea, 正!!!

又有奇遇~

hea 到咁上下, 又要踩~ 踩到林鳳營附近, 係時候避太陽~ 食飯先~

好好味呀~ 我食左佢既豬手飯~ 好淋又好入味~ 正!!!

響呢間鋪頭遇到一個台灣人, 佢一口就話同我地踩去高雄..... 我好大反應話: 高雄???!! 好遠喎.... 我諗住踩到台南咋喎.... 我慢慢踩同埋踩得慢架嘛....
點知佢一口就話好啦, 咁同你地踩到去台南啦~

我身為一個香港人, 活在大城市, 即刻諗, 呢位大哥係咪架? 唔駛做架? 話行就行, 話踩單車就踩??? 咁好笑? 我地仲要兩個女仔三唔識七喎..... 但係我地就諗, 冇所謂啦....

於是, 我地就食完飯, 飲埋我地既每日必飲 - 思樂冰之後, 去佢鋪頭搵佢~

搵到呢位大哥之後, 見佢已經成幅武裝, 準備出發同我地一齊踩~ 我地響佢鋪頭傾左陣計,傾到3點幾, 過左個太陽就出發~

呢位大哥帶我地周圍兜, 見到好多靚靚地方, 唔再只係見到公路~
左兜右兜, 其實我唔知自己響邊..... 只係知道環境好舒服~

呢位好好人既大哥, 仲教我一條開心快樂formula - 就係只眼開, 只眼閉, 仲要唔好扣高帽, 咁就可以活得快樂~ 真係好~

佢仲請我地去台糖食冰添~ 好好味~

之後我地兜左去科學園區, 環境好好呀~

如果唔係呢位大哥帶住, 我地都係沿住公路踩, 冇乜特別野睇..... 遇到佢, 真係好開心~ 一切都係緣~ 後來先知我地食晏間鋪頭係佢細佬開架~ 佢都唔係成日響0個度....真係咁arm 俾我地遇到佢~ 好多謝佢盡地主之誼, 帶我地周圍睇~

去到新市, 呢個大哥仲請我地食飯.......

我地就係咁, 由兩架戰車,變左三架戰車~

好豐富既晚餐呀~

全部都好好味呀~ 好多謝呢位大哥呀~ 三唔識七, 都可以帶我地周圍走, 仲要請埋我地食飯...... 台灣人真係好熱情好客~

我有時響度諗, 香港人同台灣人點解會差咁遠既??!! 我問返我自己, 如果有人問路, 我會點?! 我首先會打量一下佢, 驚佢係迷魂黨, 呃錢黨.... 之後最多都係會話佢知點行去, 邊有咁多時間帶埋佢去目的地, 仲請埋佢食飯丫???! 可能我地聽得大陸既騙案太多喇.... 同埋我地所有野都好匆忙, 邊有咁多時間做好人丫......

呢度附近冇乜平既住宿, 得呢間.... 係我地最貴既一晚呀.... 承惠2200台幣~ 冇所謂啦, 一晚半晚~ 豪俾佢啦~