第十六天 - 重新出發 - 高雄到楓港 (單車 - 80 km)

終於又要再上路喇........ 出發喇C 先生~

再次上路~

其實朝早落緊雨.... 咁點算? 究竟起唔起行? 我地三個都係落去食左早餐先講.....

見到個天好似想落雨咁, 但係又未落....等都唔知等到幾時, 所以我地就決定出發~ 食完早餐返民宿拎戰車~ 之前踩既時候都係好好天, 出晒太陽.... 而家會落雨, 行李要放好D, 用膠袋包實先~

準備好喇~ 同B先生SAY GOODBYE之後, 我又再次出發喇..... 我一路心諗, 究竟C先生既實力如何呢? 佢係踩得快定慢架呢? 我拗埋柴, 會唔會拖累佢呢???? 好多個問號....

 
我地一路踩.... 由於旗津既海鮮實在令人非常失望, 為左俾C先生有個希望同埋我又可以再食, 我地就決定沿住台17線落東港, 兜入去漁市場先~

踩左一陣, 抖下先~ 一路過黎都係平路, 好好踩~ C 先生都踩得幾快.....不過我都仲跟到~

 天氣仲係幾好~ 好過響高雄既時候~

魚生我又黎喇~

踩到去東港, 行錯路, MISS 左去漁市場既路... 唯有搵過第二條路兜返過去..... 行到去一個天橋底既時候..... 落好大雨呀!!!!! 好彩行錯路, 行到有瓦遮頭..... 如果冇行錯路, 真係冇遮冇擋, 一定淋死咗啦......

避左陣風頭之後, 踩去食LUNCH!!!~ 魚生做LUNCH!

 食左一大盤之後, 都係要ENCORE~

 食完既時候.... 落好大雨呀.... 我地又響度避雨喇.....

C先生話好煩, 成日要避雨.... 佢話想出太陽喎...... 但係我踩過成個星期既太陽單車之後, 我真係覺得落雨舒服D, 雖然要避雨, 但係起碼唔曬唔熱丫.....

我地等左好耐都唔停雨, 所以決定, 雨細D 既時候就出發, 唔好等佢停喇... 都唔知停唔停既....
落雨照踩~

我地沿住17號線落, 再接台1線踩~

 台灣既天氣真係變幻莫測.....

 踩到楓港, 都係響度落腳, 唔好踩喇... 天開始黑, 天氣又唔穩定.....

搵左間旅館, 放底架車之後, 去醫肚先.... 好肚餓呀.....

 今晚既住宿... 間房好大間~ 哈哈~

 食完飯, 我仲買左個芒果返黎食添~ 正~ 又香又甜又多汁~

今日差唔多全部都係平路, 其實幾好踩, 唔覺唔覺, 踩左80KM~